domingo, 11 de julho de 2010

Porgrama







Retratos antigos de las grutas de Santo Adrian
Eimaige de l cartaç - pintura de Balbina Mendes



L III Ancuontro de Bloguers Mirandeses yá ten porgrama. Nun bos squéçades que ye die 21 de Agosto i que quien quejir quemer de l jantar ten que se anscrebir: l précio son 15 ouros, i l ranxeiro ye l de l anho atrasado; para bos anscrebirdes, podeis deixar eiqui ua mansaige ó anton telfonar para l nº 961800909.
La lista de las anscriçones queda eiqui al lhado i eirá sendo amanhada. Stamos cuntentos que l Ancuontro yá ten sainete anternacional: hai 3 anscriçones de porsores spanholes i al menos 2 son falantes de Mirandés.
La Cámara Munecipal tamien partecipa, mormiente nas "Cumbersas an Mirandés" (quien nun soubir de l que se trata puode-se assomar eiqui). L tema sumbreiro ye "L Mirandés na era degetal", para quien quejir ir purparando ls amprobisos.
Quien quejir bai por San Pedro, quien nun quejir bai solo para la Senhora, mas apuis ten de andar a procurar cumo se passou. De San Pedro para la Senhora tamien se puode ir de a pie ó a cabalho, yá bedes que ye todo a la buntade de l fragués.
Bah, oupa, nun bos squéçades de l'anscriçon, se nó apuis l ranxo puode nun chegar als caneiros.
Queda eiqui l porgrama:




III Ancuontro de Bloguers Mirandeses
21 de Agosto de 2010

Senhora de l Resairo - Minas de Santo Adrian
10.00h - - Recepçon als partecipantes an San Pedro de la Silba
- Palabras de buonas-benidas de l Persidente de la Junta
- Besita a San Pedro de la Silba
11.30h - Salida para la Senhora de l Resairo, cun assomadela al Poço de la Filadeira (quien quejir bai de a pie, quien quejir bai de a cabalho, ls carros pássan bien pul camino)
13.00h – Jantar (précio 15,00€ por pessona)
15.00 - "Cumbersas an Mirandés" - L Mirandés
na era degetal
17.00 - Jogos Tradecionales
Gaita, Caixa i Bombo
Besita a las Minas de Sto. Adrian

Anscriçones an: http://bloguersnopraino.blogspot.com

talf. 961800909

6 comentários:

Boieiro disse...

Cunta cinco deste lhado.

Abraço
A.M.

Félç disse...

Puodes cuntar cun Félç de Fuonte Aldé, se lhebar acumpanhantes a sou tiempo de anformarei.

Abraço
Félç

faustino.antao disse...

-You que zde la purmeira hora que s'amentou neste ancuontro apoiei, i siempre dibulguei, peçque mais ua beç (anho) stou a cuontas culas cuontas de l tiempo.

-Yá nun ye bien pul miu lhado, que stou an cundiçones de l fintar, mas mais puls cumpormissos que la mie tie ten, que nesse die yá ten que star an Lisboua (trabalho).

-I berdade se diga, tal cumo you, eilha tamien queda cun muita pena de nun poder partilhar cun todos bós desse momiento.

- Mas staremos cun bós, de coraçon i alma.

-Stá nas mies antençones até esse die dibulgar ua mensaige a to ls persentes, para assi fortalecer la amisade que me lhiga a todos bós i acurtiar la stáncia desse guapo Santuario, que quaije to ls anhos besito.

-Até alhá que todo baia bien cun bós.

Una baraço
Faustino

Adelaide Monteiro disse...

A ber se arranjais cerrona para mi i más dous. Se houbir nobidade apuis bos dezirei.
Beisicos

delaide

Abelhon disse...

Thierry, l gambusino de la raia, acabou de me dezir que tamien bai, i se por un acause se negar queda mardomo pal anho que ben.

ACangueiro disse...

you yá fizo la anscriçon mas yé solo para reforçar eiqui bai: dous