Cuorre pula prainada antre ls puntos de cota 734 i 866, ou cume quien diç antre ls lhemites de l cunceilho de Miranda cun Mogadouro i la raia de Spanha na Cándena, ua baixa no lhombo de la Sierra de la Lhuç. Nun atrabessa lhugares que prende cun sous caminos radiales mas manten un espinaço quemun tanto antre l Norte i Sul cume antre las arribas i las uolgas de la ribeira de Tortulhas, eilemento de unión de todo l Praino: l Carril. Correr este camino zde la Cándena anté la Cruç de Braço Cobrado, ou al pa riba, ye talbéç l eisercício más apropiado para quien ten ganas de cumprender las ourieges de Miranda, de l sou pobo i de la sue lhéngua.
Assi cume essa strada ajunta las personas de l Praino, tamien las falas de cada lhugar i de cada persona son las argolhas d’ua cadena más grande que ye la lhéngua. Argolhas de sonidos abiertos ou fechados cunsoante las fraugas de cada tierra. Mas ye todo un l fierro que ajunta i pon tempra a essas argolhas: todas las falas de l Carril son la mesma Lhéngua!
Este bai a ser l assunto prancipal que mos lhebará a la Trindade no die 22: un solo Carril para mantener la unión de ua Lhéngua. I porque eilha ye de todos, cada un que dezir presente deberá lhebar un poema, un testo, ua lhona, un chiste, un pensar ou ua fala suobre ls sonidos i las letras de la lhéngua.
Tamien deixo eiqui un cumbite a todos ls candidatos a presidente de la cámara de Miranda para que esteian cun nós nesse die para falarmos todos juntos suobre l más sagrado que tenemos i tlincar cuartielhos i meios cuartielhos a çpejar remeias ou cántaros de bino.
La relaçón de quien bai a estar presente será publicada por buolta de l die 18.
