segunda-feira, 10 de agosto de 2009

lLa Lhéngua i l Carril ... l Carril de la Lhéngua




Cuorre pula prainada antre ls puntos de cota 734 i 866, ou cume quien diç antre ls lhemites de l cunceilho de Miranda cun Mogadouro i la raia de Spanha na Cándena, ua baixa no lhombo de la Sierra de la Lhuç. Nun atrabessa lhugares que prende cun sous caminos radiales mas manten un espinaço quemun tanto antre l Norte i Sul cume antre las arribas i las uolgas de la ribeira de Tortulhas, eilemento de unión de todo l Praino: l Carril. Correr este camino zde la Cándena anté la Cruç de Braço Cobrado, ou al pa riba, ye talbéç l eisercício más apropiado para quien ten ganas de cumprender las ourieges de Miranda, de l sou pobo i de la sue lhéngua.
Assi cume essa strada ajunta las personas de l Praino, tamien las falas de cada lhugar i de cada persona son las argolhas d’ua cadena más grande que ye la lhéngua. Argolhas de sonidos abiertos ou fechados cunsoante las fraugas de cada tierra. Mas ye todo un l fierro que ajunta i pon tempra a essas argolhas: todas las falas de l Carril son la mesma Lhéngua!
Este bai a ser l assunto prancipal que mos lhebará a la Trindade no die 22: un solo Carril para mantener la unión de ua Lhéngua. I porque eilha ye de todos, cada un que dezir presente deberá lhebar un poema, un testo, ua lhona, un chiste, un pensar ou ua fala suobre ls sonidos i las letras de la lhéngua.
Tamien deixo eiqui un cumbite a todos ls candidatos a presidente de la cámara de Miranda para que esteian cun nós nesse die para falarmos todos juntos suobre l más sagrado que tenemos i tlincar cuartielhos i meios cuartielhos a çpejar remeias ou cántaros de bino.
La relaçón de quien bai a estar presente será publicada por buolta de l die 18.

terça-feira, 4 de agosto de 2009

Ancuontro de Bloguers de l Praino 2009

Buonas tardes

Agora meio bagamundo por nun tener segada nien trilha, cerrados que segar ou freznos que zgalhar i l trabalho cun papeles queda meio aparbonado durante quaije todo este més , ye tiempo de mos botar a las cuontas de las fiestas no rincón de Atta, de las caminadas no Carril Mourisco i de zanferrujar la buona i la mala lhéngua.

Andube a botar cuontas a las cabeças que se apreponirun a estar no die 22 na Trindade i pulas mies cuontas anda al redor de 30. Cume la camarada de segadores mínima era de 15, yá puode benir segada que la estalha bai a salir delei.

Hoije solo bos quiero dezir que cume alhá pa la raia las nuobas tecnologies sien filo nun rigulan, qualquiera candidato más a segador, ou algua ajuda que quergades botar, debereis falar para este númaro 965218993.

I más ua beç eiqui queda tamien l cumbite a giente de fuora de l Praino que mos querga fazer cumpanha. Bonda dezir algo cun tiempo para que puodamos lhebar ua fogaça a la farta.

Benga fome i lhéngua afilada!

quinta-feira, 11 de junho de 2009

La mie política ye la lhéngua. I la tue?

No deimingo passado houbo eleiçones. Alhá para Setiembre ou Outubre teneremos outras pal Cunceilho de la República i más pal final de l anho serán las eleiçones de ls presidentes de Junta, Presidentes de Cámara i Cunceilhos de l Cunceilho. Hoije bou a falar destas, de las que ponen las personas de las aldés apartadas. Sí, porque todo mundo se conhece i la gana de mandar, a las bezes chega a un punto que anté ls armanos se anraiban.
Dízen que Miranda ye pequeinha, que ten poucas personas, que l cunceilho está a quedar un dzerto, que isto i aquilho ... a bien dezir un rinconico antre las fraldas de dous países: l sítio de ls boubos que fálan ua lhéngua más que minoritária, i que mesmo assi, lhuitan cume "gouleses" cuontra "romanos", legionários ancultos de espantadeiras, siempre prontos a dezir "danke" al senador arriba. Mas alantre que l que eiqui me trai hoije nun ye la mala lhéngua mas la nuossa lhéngua. La lhéngua que mos eidentefica, que mos fai bilingues, que solo piede que la deixen cuntinuar a ser lhéngua.
Preguntareis bós: porque ye que este ten que ambuolber la lhéngua culas eleiçones? afinal la lhéngua ye de l pobo que siempre la falou!
Nada más cierto, mas nun ye menos berdade que siempre fui la lhéngua puosta de lhado por quien tubo l mando, fusse an Miranda ou no Goberno de Pertual.
L que se fai pul mirandés a nible oufecial? I se algua cousa se fai por eilha lhougo dízen de l outro lhado: "está a querer arrebanhar botos por bias de la lhéngua!" ou que "fala pa la telbisón para se armar an amportante!"
Serán ambeijas? será falta de cumpeténcia? será falta de cultura? Nó! i Nó! i Nó! porque quien assi pensa nunca poderá defender l maior património de l cunceilho: la LHÉNGUA. I para falar deilha, neilha i cun eilha tamien haberá que poner debisones políticas no treato, no chequeiro ou no sestil.
Ye esse l dzafio que deixo eiqui a todos ls que son ou serán candidatos a las eleiçones de la Cámara de Miranda i tamien a las estruturas locales de ls partidos: FALAR DE LA LHÉNGUA - essa herdança - neste ancuontro de boubos chenos de outupies i suonhos an mirandés.

Alhá mos beremos.

Abraços a todo mundo.

sexta-feira, 15 de maio de 2009

Para chegar a la Trindade

Eiqui se ponen ls bários caminos pa la Trindade i pal Praino.
Buona biaige até alhá.

domingo, 10 de maio de 2009

La Trindade1




Trindade: a ber se las pessonas bán botando fé al die 22 de Agosto para benir anté eiqui al meio deste campo de sobreiros.
Assi que houbir más amboras eilhas serán puostas neste sítio feito d'aprepósito para cumbersar suobre esse ancuontro.
De momento solo sabemos l die i l sítio. Outras cuontas stán a ser tratadas: la merenda, la barrila, la bota i la cumbersa. Sí, que falar cun aire no stómado i secura nos beiços nun s'anrosca alhá mui bien.

terça-feira, 17 de março de 2009

Foro


Eiqui neste rinconico será un foro de çcussión suobre ancuontros de bloguers no Praino i de l Praino.

Parece que haberá un an Agosto na Trindade. Suobre él eiremos falando, scuitando las oupeniones las pessonas i botando ls promenores, anté porque l mardomo tén que trabalhar tamien pals festejeiros: anquemendar ls foguetes, chamar l padre para dezir missa, ou ua dúzia para que salga cantada, escolher l taberneiro ... todo esso i más cousas que de momento nun me benen a la eideia.