Porgrama

Retratos antigos de las grutas de Santo Adrian

Eimaige de l cartaç - pintura de Balbina Mendes

L III Ancuontro de Bloguers Mirandeses yá ten porgrama. Nun bos squéçades que ye die 21 de Agosto i que quien quejir quemer de l jantar ten que se anscrebir: l précio son 15 ouros, i l ranxeiro ye l de l anho atrasado; para bos anscrebirdes, podeis deixar eiqui ua mansaige ó anton telfonar para l nº 961800909.

La lista de las anscriçones queda eiqui al lhado i eirá sendo amanhada. Stamos cuntentos que l Ancuontro yá ten sainete anternacional: hai 3 anscriçones de porsores spanholes i al menos 2 son falantes de Mirandés.

La Cámara Munecipal tamien partecipa, mormiente nas "Cumbersas an Mirandés" (quien nun soubir de l que se trata puode-se assomar eiqui). L tema sumbreiro ye "L Mirandés na era degetal", para quien quejir ir purparando ls amprobisos.

Quien quejir bai por San Pedro, quien nun quejir bai solo para la Senhora, mas apuis ten de andar a procurar cumo se passou. De San Pedro para la Senhora tamien se puode ir de a pie ó a cabalho, yá bedes que ye todo a la buntade de l fragués.

Bah, oupa, nun bos squéçades de l'anscriçon, se nó apuis l ranxo puode nun chegar als caneiros.

Queda eiqui l porgrama:

III Ancuontro de Bloguers Mirandeses
21 de Agosto de 2010

Senhora de l Resairo - Minas de Santo Adrian

10.00h - - Recepçon als partecipantes an San Pedro de la Silba
- Palabras de buonas-benidas de l Persidente de la Junta
- Besita a San Pedro de la Silba
11.30h - Salida para la Senhora de l Resairo, cun assomadela al Poço de la Filadeira (quien quejir bai de a pie, quien quejir bai de a cabalho, ls carros pássan bien pul camino)
13.00h – Jantar (précio 15,00€ por pessona)
15.00 - "Cumbersas an Mirandés" - L Mirandés
na era degetal
17.00 - Jogos Tradecionales
Gaita, Caixa i Bombo
Besita a las Minas de Sto. Adrian

Anscriçones an: http://bloguersnopraino.blogspot.com

talf. 961800909

Fiesta de la Senhora

La Fiesta de la Senhora de l Resairo - ó de San Marcos, cumo quejirdes - ye to ls anhos ne l purmeiro demingo de Maio. Pongo-bos eiqui uns retratos para irdes quedando einougados a spera d'Agosto

Nó, nun ye la pinga que bos fai ber a drobar! Ye mesmo assi: la Senhora de l Resairo i la Senhora de San Pedro.

Hai que repicar a Santos!

Ls músicos tocórun bien.

Esta yá biu ua porrada de porciçones.

San Pedro delantre

Nun se cabie n'eigreija, por isso quedemos tantos acá fuora!

Senhora de l Resairo - 3º ancontro de bloguers mirandeses

L ancontro de Bloguers mirandeses dastanho yá ten data terminada: ye die 21 de Agosto - Sábado -, na Senhora de l Resairo, ne l termo de San Pedro, cerca de las Minas de Santo Adrian.

Ls "Mardomos" stan a tratar de l "cartaç cultural" i de l "porgrama de atebidades" - a ber se ls workshops son subre bitela assada ó subre canhono guisado - mas ua cousa ye cierta: hay que lhebar ua nabalhica para l zambolbimiento de ls trabalhos.

Este blogue ha de serbir para fazer las anscriçones -podeis dezir quien fai tençon de ir ne ls quementairos - i tamien para que déiades l buosso parecer subre cumo se ha de fazer ó l que se ha de quemer ó para dezir l que quejirdes, nun stubíramos nós an Abril, para naide mos amponer l que habemos de dezir.

Anton, botai-bos alhá, toca a fazer las anscriçones, nun seia pori que apuis falte la chicha ó que inda téngamos que la andar a quemer de castigo por le haber botado mal las cuontas.

lLa Lhéngua i l Carril ... l Carril de la Lhéngua

Cuorre pula prainada antre ls puntos de cota 734 i 866, ou cume quien diç antre ls lhemites de l cunceilho de Miranda cun Mogadouro i la raia de Spanha na Cándena, ua baixa no lhombo de la Sierra de la Lhuç. Nun atrabessa lhugares que prende cun sous caminos radiales mas manten un espinaço quemun tanto antre l Norte i Sul cume antre las arribas i las uolgas de la ribeira de Tortulhas, eilemento de unión de todo l Praino: l Carril. Correr este camino zde la Cándena anté la Cruç de Braço Cobrado, ou al pa riba, ye talbéç l eisercício más apropiado para quien ten ganas de cumprender las ourieges de Miranda, de l sou pobo i de la sue lhéngua.

Assi cume essa strada ajunta las personas de l Praino, tamien las falas de cada lhugar i de cada persona son las argolhas d’ua cadena más grande que ye la lhéngua. Argolhas de sonidos abiertos ou fechados cunsoante las fraugas de cada tierra. Mas ye todo un l fierro que ajunta i pon tempra a essas argolhas: todas las falas de l Carril son la mesma Lhéngua!

Este bai a ser l assunto prancipal que mos lhebará a la Trindade no die 22: un solo Carril para mantener la unión de ua Lhéngua. I porque eilha ye de todos, cada un que dezir presente deberá lhebar un poema, un testo, ua lhona, un chiste, un pensar ou ua fala suobre ls sonidos i las letras de la lhéngua.

Tamien deixo eiqui un cumbite a todos ls candidatos a presidente de la cámara de Miranda para que esteian cun nós nesse die para falarmos todos juntos suobre l más sagrado que tenemos i tlincar cuartielhos i meios cuartielhos a çpejar remeias ou cántaros de bino.

La relaçón de quien bai a estar presente será publicada por buolta de l die 18.

Ancuontro de Bloguers de l Praino 2009

Buonas tardes

Agora meio bagamundo por nun tener segada nien trilha, cerrados que segar ou freznos que zgalhar i l trabalho cun papeles queda meio aparbonado durante quaije todo este més , ye tiempo de mos botar a las cuontas de las fiestas no rincón de Atta, de las caminadas no Carril Mourisco i de zanferrujar la buona i la mala lhéngua.

Andube a botar cuontas a las cabeças que se apreponirun a estar no die 22 na Trindade i pulas mies cuontas anda al redor de 30. Cume la camarada de segadores mínima era de 15, yá puode benir segada que la estalha bai a salir delei.

Hoije solo bos quiero dezir que cume alhá pa la raia las nuobas tecnologies sien filo nun rigulan, qualquiera candidato más a segador, ou algua ajuda que quergades botar, debereis falar para este númaro 965218993.

I más ua beç eiqui queda tamien l cumbite a giente de fuora de l Praino que mos querga fazer cumpanha. Bonda dezir algo cun tiempo para que puodamos lhebar ua fogaça a la farta.

Benga fome i lhéngua afilada!

La mie política ye la lhéngua. I la tue?

No deimingo passado houbo eleiçones. Alhá para Setiembre ou Outubre teneremos outras pal Cunceilho de la República i más pal final de l anho serán las eleiçones de ls presidentes de Junta, Presidentes de Cámara i Cunceilhos de l Cunceilho. Hoije bou a falar destas, de las que ponen las personas de las aldés apartadas. Sí, porque todo mundo se conhece i la gana de mandar, a las bezes chega a un punto que anté ls armanos se anraiban.
Dízen que Miranda ye pequeinha, que ten poucas personas, que l cunceilho está a quedar un dzerto, que isto i aquilho ... a bien dezir un rinconico antre las fraldas de dous países: l sítio de ls boubos que fálan ua lhéngua más que minoritária, i que mesmo assi, lhuitan cume "gouleses" cuontra "romanos", legionários ancultos de espantadeiras, siempre prontos a dezir "danke" al senador arriba. Mas alantre que l que eiqui me trai hoije nun ye la mala lhéngua mas la nuossa lhéngua. La lhéngua que mos eidentefica, que mos fai bilingues, que solo piede que la deixen cuntinuar a ser lhéngua.
Preguntareis bós: porque ye que este ten que ambuolber la lhéngua culas eleiçones? afinal la lhéngua ye de l pobo que siempre la falou!
Nada más cierto, mas nun ye menos berdade que siempre fui la lhéngua puosta de lhado por quien tubo l mando, fusse an Miranda ou no Goberno de Pertual.
L que se fai pul mirandés a nible oufecial? I se algua cousa se fai por eilha lhougo dízen de l outro lhado: "está a querer arrebanhar botos por bias de la lhéngua!" ou que "fala pa la telbisón para se armar an amportante!"
Serán ambeijas? será falta de cumpeténcia? será falta de cultura? Nó! i Nó! i Nó! porque quien assi pensa nunca poderá defender l maior património de l cunceilho: la LHÉNGUA. I para falar deilha, neilha i cun eilha tamien haberá que poner debisones políticas no treato, no chequeiro ou no sestil.
Ye esse l dzafio que deixo eiqui a todos ls que son ou serán candidatos a las eleiçones de la Cámara de Miranda i tamien a las estruturas locales de ls partidos: FALAR DE LA LHÉNGUA - essa herdança - neste ancuontro de boubos chenos de outupies i suonhos an mirandés.

Alhá mos beremos.

Abraços a todo mundo.

Para chegar a la Trindade

Eiqui se ponen ls bários caminos pa la Trindade i pal Praino.
Buona biaige até alhá.