quinta-feira, 11 de junho de 2009

La mie política ye la lhéngua. I la tue?

No deimingo passado houbo eleiçones. Alhá para Setiembre ou Outubre teneremos outras pal Cunceilho de la República i más pal final de l anho serán las eleiçones de ls presidentes de Junta, Presidentes de Cámara i Cunceilhos de l Cunceilho. Hoije bou a falar destas, de las que ponen las personas de las aldés apartadas. Sí, porque todo mundo se conhece i la gana de mandar, a las bezes chega a un punto que anté ls armanos se anraiban.
Dízen que Miranda ye pequeinha, que ten poucas personas, que l cunceilho está a quedar un dzerto, que isto i aquilho ... a bien dezir un rinconico antre las fraldas de dous países: l sítio de ls boubos que fálan ua lhéngua más que minoritária, i que mesmo assi, lhuitan cume "gouleses" cuontra "romanos", legionários ancultos de espantadeiras, siempre prontos a dezir "danke" al senador arriba. Mas alantre que l que eiqui me trai hoije nun ye la mala lhéngua mas la nuossa lhéngua. La lhéngua que mos eidentefica, que mos fai bilingues, que solo piede que la deixen cuntinuar a ser lhéngua.
Preguntareis bós: porque ye que este ten que ambuolber la lhéngua culas eleiçones? afinal la lhéngua ye de l pobo que siempre la falou!
Nada más cierto, mas nun ye menos berdade que siempre fui la lhéngua puosta de lhado por quien tubo l mando, fusse an Miranda ou no Goberno de Pertual.
L que se fai pul mirandés a nible oufecial? I se algua cousa se fai por eilha lhougo dízen de l outro lhado: "está a querer arrebanhar botos por bias de la lhéngua!" ou que "fala pa la telbisón para se armar an amportante!"
Serán ambeijas? será falta de cumpeténcia? será falta de cultura? Nó! i Nó! i Nó! porque quien assi pensa nunca poderá defender l maior património de l cunceilho: la LHÉNGUA. I para falar deilha, neilha i cun eilha tamien haberá que poner debisones políticas no treato, no chequeiro ou no sestil.
Ye esse l dzafio que deixo eiqui a todos ls que son ou serán candidatos a las eleiçones de la Cámara de Miranda i tamien a las estruturas locales de ls partidos: FALAR DE LA LHÉNGUA - essa herdança - neste ancuontro de boubos chenos de outupies i suonhos an mirandés.

Alhá mos beremos.

Abraços a todo mundo.